Ադրբեջանական բանակի հատուկ նշանակության ստորաբաժանումները սկսել են զորավարժությունները անմիջապես Իրանի սահմանին՝ Ադրբեջանի հարավային սահմանների մոտ գտնվող տարածքներում:

Այս մասին հայտնել են Ադրբեջանի պաշտպանության նախարարությունից՝ նշելով, որ հատուկ նշանակության ուժերի հրամանատար, գեներալ-լեյտենանտ Հիքմեթ Միրզոևի գլխավորությամբ անցկացվող զորավարժությունների պլանի համաձայն՝ զորամասերը բերվել են «Տագնապի» ազդանշանի։

Զորավարժություններին ներգրավված են ռազմաօդային ուժերի ստորաբաժանումները: Ըստ պլանի՝ հրթիռահրետանային զորքերը կենտրոնացած են համապատասխան օդանավակայաններում և տարածքներում։ Կազմակերպվել է փոխգործակցություն այլ տիպի զորքերի հետ։

Ավելի վաղ հայտնել էինք, որ Ադրբեջանի ԶՈՒ վարժանքներն անցկացվում են պաշտպանության նախարարի հաստատած՝ 2022 թվականի մարտական պատրաստության պլանի համաձայն, վարժանքների շրջանակներում առանձին ստուգվում է հատուկ նշանակության ստորաբաժանումների որոշակի հատուկ պատրաստությունը։

Նշենք, որ հոկտեմբերին էլ Իրանի Իսլամական հեղափոխության պահապանների կորպուսի ուժերն էին լայնածավալ զորավարժություններ անցկացրել հենց Ադրբեջանի սահմանի մոտ։