Ինչպես հայտնի է, երեկ երեկոյան 47-ամյա մի քաղաքացի ինքնահրկիզում է կատարել, որի պատճառը, ըստ քաղաքացու եղբոր փոխանցած տեղեկության, 10 հազար դրամ տուգանքն է եղել, ինչի համար նրա մեքենան Պարեկային ծառայությունը նախ տեղափոխել է տուգանային հրապարակ, ապա՝ Հարկադիր կատարումն ապահովող ծառայության համապատասխան տարածք:

Տարածված լուրի առնչությամբ ԴԱՀԿ-ից պարզաբանում են, որ քաղաքացի Ազիզ Ու․-ի նկատմամբ դեռևս 2013 թվականից Ծառայությունում առկա են տարբեր պահանջատերերի՝ ապահովագրական ընկերության, ՃՈ, համատիրություն օգտին հարուցված կատարողական վարույթներ, ընդհանուր պարտավորությունը կազմում է ավելի քան 2 մլն դրամ։

Կատարողական գործողությունները, այդ թվում՝ նաև ավտոմեքենայի նկատմամբ հետախուզում հայտարարելը, պայմանավորված է եղել հիշյալ պարտավորությունների հարկադիր կատարումն ապահովելու անհրաժեշտությամբ։ Ազիզ Ու․-ն տեղեկացված եղել է իր նկատմամբ հարուցված կատարողական վարույթների մասին։

Կառույցը նշել է, որ ցավում է արձանագրված դեպքի համար և շուտափույթ ապաքինում  մաղթում քաղաքացի Ազիզ Ու․-ին։

Հիշեցնենք՝ երեկ ինքնահրկիզում կատարած տղամարդը Ջրաշենի 47-ամյա բնակիչ է: Իրականացվում են քննչական և վարութային գործողություններ 47-ամյա տղամարդու՝ ինքնահրկիզում կատարելու դեպքի հանգամանքները պարզելու ուղղությամբ:

Ավելի վաղ հայտնել էինք, որ Երևանի Պռոշյան-Դեմիրճյան փողոցների խաչմերուկում երեկ ինքնահրկիզման փորձ կատարած քաղաքացու առողջական վիճակը գնահատվում է ծանր: Այս մասին «Հայկական ժամանակ»-ին հայտնել էր ՀՀ առողջապահության նախարարի մամուլի քարտուղար Հռիփսիմե Խաչատրյանը՝ նշելով, որ քաղաքացին հիմա վերակենդանացման բաժանմունքում է:

Հիշեցնենք՝ երեկ՝ ժամը 21։27-ի սահմաններում, Ճգնաժամային կառավարման ազգային կենտրոն տեղեկություն էր ստացվել, որ Երևանի Պարոնյան-Դեմիրճյան փողոցների խաչմերուկում քաղաքացին ինքնահրկիզման փորձ է կատարել։