Ադրբեջանի արտգործնախարար Ջեյհուն Բայրամովը հայկական կողմին մեղադրել է եռակողմ հայտարարությունը խախտելու և Լաչինի միջանցքով Լեռնային Ղարաբաղ ականներ հասցնելու մեջ։ Այս մասին գրում է Baghramyan26-ը։
Ավելի ուշ ադրբեջանական կառավարական ռեսուրսները կեղծ հայտարարություն արեցին, որ Լաչինի միջանցքով իբր խաղաղապահները Գյումրիի ռուսական բազայից զենք են մատակարարել Լեռնային Ղարաբաղ՝ «խաղաղապահ հումանիտար օգնության քողի տակ»։
Նման տեղեկատվական սադրանքի նպատակն առավել քան ակնհայտ է՝ տեղեկատվական պատրվակ ստեղծել Լաչինի միջանցքում ադրբեջանական անցակետ ստեղծելու համար։
Ադրբեջանական կողմը հասկացավ, որ Հայաստանի ինքնիշխան տարածքում Զանգեզուրի միջանցքը չի հաջողվի ձեռք բերել ուժով կամ ուժի սպառնալիքով, առավել եւս, որ դա նախատեսված չէր նոյեմբերի 9-ի եռակողմ հայտարարությամբ։
Երեւանի դիրքորոշումն այս հարցում անզիջում է. Բոլոր ապաշրջափակված ճանապարհները պետք է մնան այն երկրների ինքնիշխանության ներքո, որոնցով նրանք կանցնեն։ Բայց Բաքուն, կարծես թե, չի պատրաստվում համակերպվել սրա հետ։
Եթե Ադրբեջանը նման քայլի դիմի և պահանջի Լաչինի միջանցքում անցակետ ստեղծել, դա մի կողմից կլինի եռակողմ հայտարարության կոպիտ խախտում, իսկ մյուս կողմից՝ հարված ռուսական միջնորդությանը և խաղաղապահ առաքելությանը։
Հիշեցնենք նաև, որ երեկ ոստիկանության Ասկերանի շրջանային բաժնում տեղեկություն է ստացվել, որ ժամը 12:30-ի սահմաններում, Ստեփանակերտ քաղաքի բնակիչ Կ. Մարտիրոսյանը (ծնված 1969թ.) «Բելառուս» մակնիշի տրակտորով Խրամորթ գյուղի վարչական տարածքում Մ.Առաքելյանին պատկանող «100 հեկտար» կոչվող տարածքում աշխատանքներ իրականացնելիս, հարակից ադրբեջանական մարտական դիրքից` նրանց ուղությամբ հրաձգային զինատեսակներից կրակ են բացել։
Արձակված կրակոցներից ջարդվել է տրակտորի դիմապակին և ղեկակառավարման սարքերի վահանակը։
Տվյալները փոխանցվել են ռուսական խաղաղապահ զորակազմին։
