Կարդացեք նաև
Ադրբեջանն ուզում է առնվազն Ղարաբաղի կապիտուլյացիա, պատրաստ ենք ցավոտ փոխզիջումների. Փաշինյանի պատերազմական հայտարարությունների հետքերով
168.am-ը շարունակում է 44-օրյա պատերազմից 2 տարի հետո հիշեցնել ուշագրավ դրվագները՝ օրերով,  քաղաքական, ռազմաքաղաքական, ռազմական տեսանկյունից ներկայացնելով, մասնավորապես, երկրի ղեկավարության, իշխանական շրջանակների որոշ հայտարարությունները, հարցազրույցները, ֆեյսբուքյան գրառումները, որոնց այսօր հատկապես արժե հետադարձ հայացք գցել՝ հասկանալու համար բազմաթիվ երևույթներ: Այս անգամ առանձնացրել ենք հոկտեմբերի 25-27-ն ընկած ժամանակահատվածը:

ՆԱՏՕ-ն պատասխանատվություն է կրում 44-օրյա պատերազմում Թուրքիայի գործողությունների համար. հակամարտության գոտում պիտի տեղակայվի ռուսական զորքը

2020-ի հոկտեմբերի 25-ին Նիկոլ Փաշինյանը հարցազրույց է տվել հնդկական WION հեռուստաընկերությանը, որտեղ նախ խոսում է այն մասին, որ երբ Հայաստանը պատրաստակամություն է հայտնում որևէ փոխզիջման, «այսինքն՝ իր դրած նշաձողը թեկուզ մի փոքր իջեցնում է, Ադրբեջանն առաջ է քաշում նոր պահանջներ, նոր պայմաններ»:

Միաժամանակ Նիկոլ Փաշինյանն ասում է, որ միջազգային հանրությունը կիրառելի պիտի համարի ԼՂ-ի համար «անջատում հանուն փրկության» բանաձևը», որից, մեծ հաշվով, հենց ինքը շեղվեց:

Խոսելով, Թուրքիայի՝ 44-օրյա պատերազմին ներգրավվածության մասին, Նիկոլ Փաշինյանն ուղիղ տեքստով նշում է, որ ՆԱՏՕ-ն այս առումով որոշակի պատասխանատվություն է կրում:

«Թուրքիան ՆԱՏՕ-ի անդամ է, և կարծում եմ՝ այն գործողությունները, որոնք կատարվում են հիմա Թուրքիայի կողմից Լեռնային Ղարաբաղի դեմ պատերազմում, որոշակի պատասխանատվություն են դնում նաև ՆԱՏՕ-ի վրա: Այսօր (հոկտեմբերի 23-ին) Human Rights Watch կազմակերպությունն արձանագրել է, որ Ադրբեջանի կողմից Ղարաբաղի հակամարտության գոտում օգտագործվում են արգելված զենքեր, մասնավորապես՝ կասետային ռումբեր, որոնք միջազգային իրավունքի կոպտագույն խախտում են: Եվ երբ ՆԱՏՕ-ի անդամ երկիրը ներգրավված է այս գործընթացում, երբ ՆԱՏՕ-ի անդամ երկիրը վարձկանների և ահաբեկիչների է տեղափոխում հակամարտության գոտի՝ Լեռնային Ղարաբաղի դեմ պատերազմ սկսելու համար, այստեղ ուղղակի է ՆԱՏՕ-ի պատասխանատվությունը, և ՆԱՏՕ-ն պետք է այս հարցերին պատասխանի: Ի վերջո, ինչպե՞ս է ինքը վերաբերվում, երբ իր անդամ պետությունը՝

1. վարձում է ահաբեկիչների և վարձկանների և տեղափոխում հակամարտ գոտի,

2. մասնակցում է մի գործընթացի, որտեղ օգտագործվում են արգելված զենքեր, և որտեղ հրթիռակոծությունների է ենթարկվում խաղաղ բնակչությունը»,- նշում է Փաշինյանը:

Այնուհետ նա կարևորում է հակամարտության գոտում հենց ռուսական խաղաղապահ զորքերի տեղակայումը:

«Մենք կարծում ենք, որ տվյալ իրավիճակում ելք կարող է լինել ռուսական խաղաղապահ ուժերի տեղակայումը հակամարտության գոտում: Մեր կարծիքով՝ միջազգային հանրությունը և, մասնավորապես, ԵԱՀԿ Մինսկի խմբի համանախագահ երկրները պետք է աջակցեն, քաջալերեն, որպեսզի ռուսական խաղաղապահ զորքերի տեղակայումը հակամարտության գոտում տեղի ունենա: Որովհետև այլ պարագայում որևէ կոնկրետ գործողություն չենք տեսնի հումանիտար ճգնաժամը կանխելու ուղղությամբ,- հնդկական հեռուստաընկերությանը տված հարցազրույցում շեշտում է Փաշինյանը և հավելում,- Գիտեք, ես կարծում եմ, որ ԵԱՀԿ Մինսկի խմբի համանախագահները պետք է մեկտեղեն ջանքերը խնդրի կարգավորման վրա և ոչ թե առանձին նախաձեռնություններով հանդես գան: Եվ ես կարծում եմ, որ այս իրավիճակում ճիշտ կլինի, որ ԵԱՀԿ Մինսկի խմբի համանախագահող երկրներ Միացյալ Նահանգները և Ֆրանսիան աջակցեն Ռուսաստանի խաղարարար ջանքերին և ոչ թե իրենք փորձեն առանձին խաղաղարար նախաձեռնություններ ցուցաբերել: Մանավանդ որ, Ռուսաստանը, մոտ լինելով և ներկա լինելով տարածաշրջանում, ավելի գործուն լծակներ ունի իրավիճակի վրա կոնկրետ ազդեցություն գործելու համար»:

Պատերազմից հետո, սակայն, մեկ անգամ չէ, որ Նիկոլ Փաշինյանը ռուս խաղաղապահներին մեղադրել է անգործության մեջ, իսկ ՀՀ տարածք՝ հայ-ադրբեջանական սահմանի տարբեր հատվածներում որոշել է տեղակայել միջազգային դիտորդների։ Ավելին՝ արվում է ամեն ինչ ռուսական ներկայությունը մեր երկրում և տարածաշրջանում նվազեցնելու ուղղղությամբ: Սա քննարկման առանձին թեմա է:

Ի դեպ, հնդկական հեռուստաընկերության ներկայացուցչի հարցին՝ Թուրքիան հայտարարել է, որ պատրաստ է ռազմական աջակցություն ցուցաբերել Ադրբեջանին, եթե այդպիսի խնդրանք լինի, արդյո՞ք Հայաստանը պատրաստ է հակազդել թուրքական զինուժին, եթե այն բացահայտ ներգրավվի հակամարտության մեջ, Նիկոլ Փաշինյանը պատասխանել է, որ գործնականում Թուրքիան արդեն իսկ մասնակցում է պատերազմին, իսկ Արցախի Պաշտպանության բանակը դիմակայում է այդ ուժերին:

Այսինքն, ոչ մի խոսք Արցախին ռազմական աջակցություն ցույց տալու ՀՀ պատրաստակամության մասին՝ որպես պատասխան քայլ, մինչդեռ պատերազմից առաջ Փաշինյանը շատ հանգիստ հայտարարում էր․ «Արցախը Հայաստան է, և վերջ»:

Իսկ նախկին իշխանությունները, թեպետ հրապարակներում նման բարձրագոչ քաղաքական հայտարարություններ չէին անում, սակայն 2016-ի Ապրիլյան պատերազմի օրերին՝ ապրիլի 3-ին, ՀՀ-ում հավատարմագրված օտարերկրյա պետությունների դեսպանությունների ռազմական կցորդների հետ հանդիպման ժամանակ Դավիթ Տոնոյանը հստակ հայտարարել էր. «Հայկական կողմը պատրաստ է ցանկացած զարգացման, անհրաժեշտության դեպքում՝ ընդհուպ մինչև ուղղակի ռազմական աջակցության ԼՂՀ պաշտպանության»:

Ադրբեջանն ուզում է առնվազն Ղարաբաղի կապիտուլյացիա. պատրաստ ենք ցավոտ փոխզիջումների…

2020-ի հոկտեմբերի 26-ին ֆեյսբուքյան իր էջում ուղիղ եթերի ժամանակ Նիկոլ Փաշինյանը հայտարարել էր․ «Ադրբեջանը ոչ թե հարցի կարգավորում է ուզում, այլ ՝ առնվազն Ղարաբաղի կապիտուլյացիա», և խոսեց ՀՀ-ի՝ ցավոտ փոխզիջումներին պատրաստ լինելու մասին:

«Հայ ժողովուրդը պատրա՞ստ է արդյոք փոխզիջումների։ Ես կարող եմ ասել՝ այո, պատրաստ է, նույնիսկ՝ պատրաստ ենք ցավոտ փոխզիջումների, բայց արդյո՞ք հայ ժողովուրդը պատրաստ է կապիտուլյացիայի: Ես կարծում եմ, որ հայ ժողովուրդը դրան պատրաստ չէ, և հայ ժողովուրդը, որքան էլ դա անհնար է թվում մեր սահմանափակ ռեսուրսների տրամաբանության մեջ, պետք է ռեսուրսներ գտնի դիմակայելու և իր իրավունքները պաշտպանելու»,- նշել էր Փաշինյանը՝ հավելելով, որ պետք է այնպես անենք, որ իրավիճակը փոխվի, և Ադրբեջանը պատրաստ լինի փոխզիջումների:

«Շատ ճակատագրական պահ է, և մեզնից որևէ մեկը չի կարող հույս ունենալ, որ Հայաստանում, Սփյուռքում կգտնվեն ուժեր, որոնք այս հարցը կլուծեն։ Այս հարցի լուծման մի տարբերակ կա, որ հայ ժողովրդի յուրաքանչյուր ներկայացուցիչ այս օրակարգին նվիրված լինի այնքան, որքան նվիրված են այն զինվորները, որոնք նույնիսկ կյանքի գնով իրենց դիրքը չեն լքում»,- շարունակել էր նա։

Այս համատեքստում Փաշինյանը նշել էր, որ կան իրենց կյանքի գնով, առյուծի նման կռվող տղաներ, նրանց պետք է պատշաճ գնահատանքի արժանացնել, բայց կան նաև մարդիկ, «որոնք փախչում են մարտի դաշտից, և նրանք պետք է արժանանան հանրային ամենասուր պարսավանքի, ինչ պատճառով էլ, որ լքած լինեն մարտի դաշտը»:

Նիկոլ Փաշինյանն այս միտքն ավարտել էր կոչով, թե ՀՀ-ում, Սփյուռքում տղամարդ թե կին պիտի կանգնենք հայրենիքի պաշտպանության համար, քանի որ մենք գտնվում ենք մեր շահերի եզրագծին:

«Քանի դեռ կատարում եմ գերագույն հրամանատարի պարտականությունները, քանի դեռ գերագույն հրամանատար եմ, պահանջում եմ, որ ՀՀ յուրաքանչյուր քաղաքացի ենթարկվի իմ կոչին, իմ որոշմանը, իմ հրամանին»,- ընդգծել էր Փաշինյանը:

Նույն օրը՝ հոկտեմբերի 26-ին, Աննա Հակոբյանը գրառում է անում ֆեյսբուքյան իր էջում․ «Վաղվանից 13 հոգանոց կանանց ջոկատը՝ այդ թվում ես ինքս, կսկսենք զինվորական պարապմունքներ։ Մի քանի օրից կմեկնենք մեր հայրենիքի սահմանները պաշտպանելու»:

Այնուհետ սրանից 10 օր հետո՝ 2020-ի նոյեմբերի 6-ին, Աննա Հակոբյանը ֆեյսբուքյան իր էջում տեղեկացնում է․ «Մեր ջոկատը տասնօրյա մարզումներից հետո պատրաստ է մարտական առաջադրանքի կատարման։ Ջոկատը կոչել ենք Հայոց թագուհի Էրատոյի անունով»:

Այսինքն, երբ Աննա Հակոբյանը նոր-նոր որոշում է զինվորական պարապմունքներ սկսել իր ջոկատի հետ, այդ ժամանակ արդեն զգալի տարածքներ էինք կորցրել՝ Մատաղիս, Թալիշ, Ջրական, Հադրութ, Կովսական՝ Զանգելան, Վարանդա՝ Ֆիզուլի, Սանասար՝ Կուբաթլու:

Իսկ երբ «Էրատո» ջոկատը պատրաստ էր մարտական առաջադրանք կատարելուն՝ նոյեմբերի 6-ին, վերը նշվածից բացի, էլի տարածքներ էինք կորցրել և կանգնած էինք Շուշին կորցնելու վտանգի առջև:

Վերադառնալով Նիկոլ Փաշինյանի՝ փախուստի դեպքերի մասին հայտարարություններին, նշենք, որ ՀՀ գլխավոր դատախազությունից 168.am-ին հայտնել էին, որ 2022-ի հունիսի 1-ի դրությամբ 2020-ի սեպտեմբերի 27-ից նոյեմբերի 9-ը գործող ՀՀ քրեական օրենսգրքի 362-րդ հոդվածի 2-րդ մասի (դասալքությունը, որը կատարվել է ռազմական դրության, պատերազմի ժամանակ կամ մարտի պարագաներում) հատկանիշներով հարուցվել է 214 քրեական գործ, որոնցով որպես մեղադրյալ է ներգրավվել 59 զինծառայող, այդ թվում՝ 1 շարքային և 58 պահեստազորային: Դատարան է ուղարկվել նշված հոդվածով 1 քրեական գործ, իսկ 11 գործով նախաքննությունը 2022թ. հունիսի 1-ի դրությամբ շարունակվել է:

«Բացի այդ, ՀՀ քրեական նախկին (տվյալ ժամանակահատվածում գործող) օրենսգրքի 361-րդ հոդվածի 6-րդ մասի (ռազմական դրության, պատերազմի ժամանակ կամ մարտի պարագաներում զորամասը կամ ծառայության վայրն ինքնակամ թողնելը) հատկանիշներով հարուցվել է 192 քրեական գործ, որոնցով որպես մեղադրյալ է ներգրավվել 71 զինծառայող, այդ թվում՝ 2 սպա, 12 պայմանագրային, 50 շարքային և սերժանտ, 7 պահեստազորային: Նշված քրեական գործերից 10-ը մեղադրական եզրակացությամբ ուղարկվել է դատարան, իսկ 47 քրեական գործով նախաքննությունը 2022թ. հունիսի 1-ի դրությամբ շարունակվել է»,- մանրամասնել էին դատախազությունից:

Ի դեպ, 2020-ի հոկտեմբերի 26-ին Արցախի Հանրապետության նախագահ Արայիկ Հարությունյանը ՊԲ մարտական կառավարման կենտրոնում հայտնեց, որ ՊԲ հրամանատար է նշանակվել գեներալ-լեյտենանտ Միքայել Արզումանյանը՝ փոխարինելով Ջալալ Հարությունյանին:

Իսկ եթե նոյեմբերի 9-ին կամ 10-ին հայ ժողովուրդը պատրաստ չէր Արցախի կապիտուլյացիային, կամ կապիտուլյացիոն փաստաթղթին, որով իբր թե ազդարարվեց 44-օրյա պատերազմի ավարտը, ապա հետո աստիճանաբար համակերպվեց այս մտքին, իսկ հիմա արդեն ՀՀ սուվերեն տարածքից է Ադրբեջանն ավելի քան 100 քառակուսի կիլոմետր օկուպացրել, և սեղանին արդեն կապիտուլյացիոն երկրորդ փաստաթուղթն է դրված:

Պատերազմը մտել է մի փուլ, երբ դրա շարունակության ամեն վայրկյանը փլուզում է հակառակորդի իլյուզիաները. Փաշինյանի սուտը

2020-ի հոկտեմբերի 27-ին Նիկոլ Փաշինյանը հերթական անգամ ուղերձով դիմում է ժողովրդին:

Եվ մեկ օր առաջ Ադրբեջանի՝ առնվազն Արցախը կապիտուլյացնելու մտադրության և մեր՝ սեփական շահերի սահմանագծին հասնելու մասին խոսող Նիկոլ Փաշինյանը, մեկ էլ խոսում է թշնամու իլյուզիաների փլուզումից, երբ արդեն բավականին կարևոր տարածքներ էինք կորցրել:

«Պատերազմը մտել է մի փուլ, երբ դրա շարունակության ամեն վայրկյանը տեղապտույտի մեջ է գցում ամեն անգամ հրադադարը ուխտադրուժ կերպով խախտող հակառակորդին՝ փլուզելով նրա ունեցած իլյուզիաները:

Ադրբեջանի ռազմաքաղաքական ղեկավարությունը այնքան է հաղթական լուրերով սնել սեփական հանրությանը, որ նրանք արդեն երկար ժամանակ ամեն օր, ամեն րոպե, ամեն վայրկյան սպասում են Արցախի անկման, իրենց վերջնական և անշրջելի հաղթանակի մասին լուրին:

Ադրբեջանի հանրությունը, սակայն, այդ լուրը չի ստանալու, Ադրբեջանի հանրությունը այդ լուրը չի ստանալու, և այս լուրի անվերջ սպասումն է, որ քանդելու է Արցախը նվաճելու ադրբեջանական պլանները:

Արցախի ժողովուրդը, հայ ժողովուրդը, ամբողջ հայությունը կռվելու է անմնացորդ՝ ամեն ծառի, ամեն քարի, ամեն սանտիմետրի և ամեն միլիմետրի համար, և անհրաժեշտ պահին ճշգրիտ հասցված հակահարվածը հակառակորդի համար կործանարար փլուզման էֆեկտ է ունենալու:

Հենց այս պահը հասունացնելն է Արցախի Պաշտպանության բանակի խնդիրը, և մենք պետք է ամեն ինչով աջակցենք, թև ու թիկունք լինենք Արցախի Հանրապետությանը, Պաշտպանության բանակին,- վստահեցրել էր Փաշինյանը և հավելել,– Մեր հնարավորություններն անսահմանափակ չեն, բայց Արցախի Պաշտպանության բանակն ունի բավարար չափով զենք և պոտենցիալ՝ իր առաջ դրված խնդիրները լուծելու համար»:

Նշենք, որ Սեյրան Օհանյանը 168.am-ին ասել էր, որ 2020-ի նոյեմբերի 7-ին Արայիկ Հարությունյանի խնդրանքով, ինքը և ԱԱԾ նախկին պետ Արգիշտի Քյարամյանը մեկնել են Երևան՝ սպառազինության հետ կապված որոշ հարցեր քննարկելու:

Ավելին, ավելի ուշ համացանցում հայտնվեց Արցախի նախագահ Արայիկ Հարությունյանի ու նրա գլխավորած «Ազատ Հայրենիք» կուսակցության նախկին անդամ Ռուսլան Իսրայելյանի հեռախոսազրույցի ձայնագրությունը, որտեղ Հարությունյանը, ենթադրաբար, խոսելով Երևանից ակնկալվող օգնության մասին, հայտարարում է՝ Ստեփանակերտի մատույցները դատարկ են, տասը օր է՝ ասում է՝ մարդ տվեք, Ստեփանակերտը պահեմ, չեն ուղարկում։

«Տասը օր ա՝ ասում եմ՝ Ստեփանակերտը մնացել է երկու կաղի հույսի։ «26»-ը (դիրքեր Ստեփանակերտի մատույցների մոտ) դատարկ է: Արա դե… երկու մարդ ունենք, երկու մարդով դիրք պահել լինո՞ւմ է, քանի՞ մարդ կա։ Կռիվ անելով եկել Շուշի են հասել»,- ձայնագրության մեջ ասում էր Արցախի նախագահը:

Հաշվի առնելով պատերազմի ելքը, կարո՞ղ ենք ենթադրել, որ Նիկոլ Փաշինյանը ստում էր, երբ վստահեցնում էր, որ Պաշտպանության բանակը և՛ զենք ունի, և՛ պոտենցիալ իր խնդիրները լուծելու համար, և որ ՀՀ-ն պատրաստ է թիկունք լինել Արցախին:

Նշենք, որ ՀՀ քաղաքացին թիկունք եղել է, Արցախին թիկունք չի եղել ՀՀ ղեկավարությունը:

Հավելենք, որ այդ օրերին հակառակորդի «ձեռքը» հասել էր արդեն Ավետարանոցի ձորակի գյուղերին. Ըստ «Հետքի» հոկտեմբերի 26-ին Ադրբեջանը գրավել է Մադաթաշենը, հոկտեմբերի 26-27-ին` Մոշխմհատը, հոկտեմբերի 27-ին՝ Ակնաղբյուրն ու Ավետարանոցը, հոկտեմբերի 28-ին՝ Սղնախի հիմնական մասը, 29-ին՝ ամբողջությամբ։

Ի դեպ, «Հետքի» փոխանցմամբ, հոկտեմբերի 27-ին, երբ Ավետարանոցը, Մոշխմհատը, Մադաթաշենն ամբողջությամբ անցան հակառակորդի վերահսկողության տակ, Արծրուն Հովհաննիսյանը քարտեզ ներկայացրեց, ըստ որի՝ Ավետարանոցում մարտեր են։

Արծրուն Հովհաննիսյանը քարտեզը ցույց տալուն զուգահեռ՝ հայտարարեց, որ քարտեզում նշված գյուղերում դիվերսիոն ներթափանցում կատարող խմբերի դեմ պայքարը շարունակվում է։

Պաշտոնական լրատվությունն Արծրուն Հովհաննիսյանի միջոցով հոկտեմբերի 25-27-ը չի ներկայացրել մարտական գործողությունների իրական ընթացքը և պարունակել է կեղծ տվյալներ։

Օրինակ՝ Ավետարանոցում, ըստ պաշտոնական լրատվության, հոկտեմբերի 27-ին մարտեր են, բայց գյուղն արդեն գրավված էր։

Բանակը կանգնեց Նիկոլ Փաշինյանի կողքին ՝մերժելով Վազգեն Մանուկյանին

Նշենք, որ 2020-ի հոկտեմբերի 27-ին Վազգեն Մանուկյանը պահանջեց Նիկոլ Փաշինյանի կառավարության հրաժարականը՝ ասելով, որ  ողջ իշխանությունը պետք է հանձնվի բանակին:

«Հայրենակիցնե՛ր,

Մենք այժմ, չնայած մեր ժողովրդի հերոսական պայքարին, ապրում ենք մեր պատմության ամոթալի և կործանարար էջերից մեկը։

Վտանգված է ոչ միայն Արցախը, այլև Հայաստանը և հայության ապագան։

Կարելի՞ է արդյոք փոխել իրավիճակը, բեկում մտցնել։ Այո՛։ Բայց ոչ ներկա կառավարման օրոք։

Ի՞նչ է պետք անել։

1․ Այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում դա պետք է անի կամավոր, առանց ցնցումների, որոնք կարող են կործանարար լինել։

2․ Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ։

Սա միակ փրկությունն է: Հակառակ դեպքում մենք կարող ենք կորցնել ամեն ինչ»,- նշվում էր Վ. Մանուկյանի հայտարարության մեջ:

Նույն օրը՝ հոկտեմբերի 27-ին, ՀՀ պաշտպանության նախարարությունը և ՀՀ ԶՈՒ գլխավոր շտաբը համատեղ հայտարարությամբ հանդես եկան՝ շեշտելով, որ անվերապահորեն կատարելու են ՀՀ Գերագույն հրամանատարի հրամաններն ու որոշումները:

«Առավելևս ռազմական դրության պայմաններում Հայաստանի Զինված ուժերը հավատարիմ են օրենքով նախատեսված աստիճանակարգությանը և շարունակելու են անվերապահորեն կատարել ՀՀ Գերագույն հրամանատարի, Կառավարության և պաշտպանության նախարարի հրամաններն ու որոշումները:

ՀՀ պաշտպանության նախարարությունը և զինված ուժերի գլխավոր շտաբը քաղաքական և մերձքաղաքական շրջանակներին կոչ են անում զերծ մնալ պառակտիչ հայտարարություններից և գործողություններից»,- նշվում էր ՊՆ և ԳՇ հայտարարության մեջ:

Մի կողմից, զինված ուժերը չցանկացան ռազմական դրության պայմաններում օրենք խախտել, երբ դեռ պատերազմական գործողություններ էին ընթանում, մյուս կողմից՝ ՀՀ զինված ուժերը 2021-ի փետրվարին պահանջեցին Նիկոլ Փաշինյանի հրաժարականը, երբ դեռ վերացված չէր ռազմական դրությունը:

Իսկ Նիկոլ Փաշինյանն այսօր շարունակում է պնդել, որ Զինված ուժերը, բանակը, հրամանատարները այնպիսի հրամաններ են ընդունել, որ ինքը չի կարողանում հասկանալ ո՛չ քաղաքականապես, ո՛չ բարոյապես, ո՛չ ռազմականապես, և բանակը կարող էր անգամ իր ունեցած ռեսուրսով և իր դիմաց կռվող մի քանի երկրի պարագայում պատերազմն այլ հունով տանել:

Այսինքն, պատերազմի պարտությունը գցում է պատերազմի ժամանակ իրեն ենթարկված և իր դեմ դուրս չեկած գեներալների «գրպանը», ինչը, ըստ էության, գեներալիտետին չի էլ մտահոգում այնքանով, որ նրանք շարունակում են դեմ դուրս չգալ Նիկոլ Փաշինյանին…
27 Հոկտեմբեր‎ 2022 - 19:55
78
Աղբյուր 168.am

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև