«Հայերը դեռ հրաժարվում են ականապատ դաշտերի քարտեզներ տրամադրել». Մամեդովը զոհերի թիվ է հրապարակել
«Ադրբեջանը թեւակոխել է հետկոնֆլիկտային շրջան. hայկական օկուպացիայի հետևանքով իրենց հողերը լքած մեր քաղաքացիների վերադարձը մեր երկրի առաջնահերթ խնդիրն է այսօր»։ Այս մասին այսօր ասել է Ադրբեջանի փոխարտգործնախարար Էլնուր Մամեդովը՝ ելույթ ունենալով Օմբուդսմենների և մարդու իրավունքների ազգային ինստիտուտների Բաքվի միջազգային համաժողովում: Այս մասին հայտնում են ադրբեջանական լրատվամիջոցները:
Ագրեսոր երկրի փոխնախարարը նշել է, որ վերջին 2 տարիների ընթացքում պետբյուջեից ավելի քան 3 մլրդ դոլար է հատկացվել ազատագրված տարածքների վերականգնման համար։
«Հայերն ամբողջությամբ ոչնչացրել են օկուպացիայից ազատագրված տարածքների ենթակառուցվածքները։ Հիմա մենք պետք է զրոյից վերականգնենք այդ տարածքները։ Սակայն այդ տարածքների` հայերի կողմից ականապատված լինելը վերականգնողական աշխատանքների հիմնական խոչընդոտն է։ Հայերը դեռ հրաժարվում են ականապատ դաշտերի քարտեզներ տրամադրել։ Իսկ քարտեզների ճշգրտությունը նույնիսկ 25% չէ։ Մինչ օրս ականների պայթյունի զոհ է դարձել մոտ 3300 մարդ»,- հավելել է Ադրբեջանի փոխարտգործնախարարը։
