Հայաստանն առաջին ոսկե մեդալն է նվաճել սամբոյի դեռահասների, պատանիների և երիտասարդների աշխարհի առաջնությունում
Երևանում ընթացող առաջնությունում հաղթողի տիտղոսը նվաճել և պատվո հարթակի առաջին աստիճանին է կանգնել 53 կգ քաշային Ռոբերտ Սիմոնյանը։ Պատանի մարզիկն իր այս հաղթանակը նվիրել է պատերազմում զոհված տղաներին։
Նորընծա չեմպիոնին պարգևատրել են ԿԳՄՍ նախարարի տեղակալ Կարեն Գիլոյանը և Հայաստանի սամբոյի ֆեդերացիայի նախագահ Միքայել Հայրապետյանը։
Նշենք՝ մրցումային երկու օրերի ընթացքում հայ մարզիկ-մարզուհիներն արդեն 17 մեդալ են նվաճել, որոնցից 1-ը ոսկե, 2-ը՝ արծաթե, 14-ը՝ բրոնզե։
ԿԳՄՍ նախարարի տեղակալ Կարեն Գիլոյանն ընդգծում է՝ սպասելիքներն արդեն իսկ գերազանցվել են․ «Առաջնության մեկնարկին կանխատեսում էի, որ կկարողանանք 15 մեդալ նվաճել, բայց մրցումային երկրորդ օրը մեր մարզիկներն արդեն այդ թիվը գերազանցել են։ Սա իսկապես գոհացնող արդյունք է։ Սամբոն այն մարզաձևն է, որտեղ մենք միշտ լավ արդյունքներ ենք գրանցել և շարունակելու ենք գրանցել»։
Հայաստանի սամբոյի ֆեդերացիայի նախագահ Միքայել Հայրապետյանը ևս մեր թիմերի՝ մինչ այս պահը գրանցած արդյունքները գոհացնող է համարում, միևնույն ժամանակ նշում՝ մեր մեդալային հիմնական հավակնորդները պայքարի են դուրս գալու մրցումային վերջին օրը՝ հոկտեմբերի 16-ին։ Հայրապետյանը նաև նշում է՝ միջազգային գործըկերները տպավորված են այն ամենով, ինչ տեսան Հայաստանում․ «Միջազգային ֆեդերացիայի ներկայացուցիչները խոստովանում են, որ նմանօրինակ առաջնություն՝ թե՛ կազմակերպչական առումով, թե՛ բացման գեղեցիկ արարողությամբ, երբևէ չէին տեսել։ Այս առաջնությունն, իսկապես, հավակնում է պատմության մեջ լավագույնը համարվելուն, և մենք շատ հպարտ ենք այդ առիթով»։
Հոկտեմբերի 16-ին մեդալների համար կպայքարեն մարզական սամբոյի երիտասարդական տարիքի մարզիկները: Աղջիկների և տղաների պայքարում Հայաստանն ընդհանուր առմամբ 12 ներկայացուցիչ կունենա։
