Հոկտեմբերի 2-ին ադրբեջանական տելեգրամյան ալիքներում հայտնվեցին տեսանյութեր, որտեղ ադրբեջանցի զինվորականները գնդակահարում են հայ գերեվարված զինծառայողներին։

Միջազգային և համեմատական իրավունքի կենտրոնի նախագահ Սիրանուշ Սահակյանը դեպքից հետո լրատվամիջոցների հետ զրույցում ասել էր, որ  տեսանյութում երևում է, որ դիրքում գտնվել է 9 զինծառայող, տեսանյութում երևում է 4-ի գնդակահարությունը: Սակայն տարածված տեսանյութում այլ հայ գերիներ ևս կան:

Հոկտեմբերի 3-ին ՊՆ խոսնակը 168.am-ին ասել էր, որ դեպքի տեղանքը տեղորոշված է, սակայն, թե կոնկրետ որ հատվածում, ՊՆ ներկայացուցիչը չէր հրապարակել։

Այսօր 168.am-ը ՊՆ մամուլի քարտուղար Արամ Թորոսյանից հետաքրքրվեց, արդյո՞ք տեսանյութում եղած հայ զինծառայողների ինքնությունն արդեն պարզել են, և արդյո՞ք տղաների մարմինները փոխանցվել են հայկական կողմին։

«Նույնականացման աշխատանքներ են իրականացվել, կան նույնականացված զինծառայողներ։ Սակայն այդ աշխատանքները լիարժեք չեն ավարտվել»,- նշեց Արամ Թորոսյանը։

Ինչ վերաբերում է  հարցին՝ թե այդ տղաների մարմինները փոխանցվե՞լ են  հայկական կողմին, Արամ Թորոսյանն առաջարկեց գրավոր ուղղել հարցը։ ՊՆ խոսնակի առաջարկին հետևելով 168.am-ը գրավոր կուղղի հարցը պաշտպանության գերատեսչությանը, ակնկալելով հանրությանը բավարարող լիարժեք պատասխան, որն անմիջապես կհրապարակենք:

Հիշեցնենք, որ սեպտեմբերի 13-ին, ժամը 00։05-ի սահմաններում Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ՝ ինտենսիվ կրակ էին բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ։

Սեպտեմբերի 19-ին Նիկոլ Փաշինյանի գլխավորությամբ տեղի ունեցած Անվտանգության խորհրդի նիստից հետո հրապարակված հայտարարությունում մասնավորապես նշված է․ «Հայաստանի Հանրապետության ինքնիշխան տարածքի նկատմամբ Ադրբեջանի զինված ուժերի  իրականացրած ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում՝ զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 3 քաղաքացիական անձ, գերեվարվել է 20 զինծառայող:

Հիշեցնենք նաև, որ սեպտեմբերի 28-ին ադրբեջանական կողմը կրկին հարձակվել էր Հայաստանի վրա, որի արդյունքում հայկական կողմն ունեցել է 3 զոհ։