Թուրքիայի և Ադրբեջանի հատուկ նշանակության ուժերը համատեղ զորավարժություններ են սկսել, թվիթերյան գրառմամբ տեղեկացրել է Թուրքիայի պաշտպանության նախարարությունը։
Գերատեսչության հաղորդագրության համաձայն՝ Թուրքիայում հոկտեմբերի 3-ին մեկնարկած վարժանքները կշարունակվեն մինչև հոկտեմբերի 14-ը։
Հիշեցնենք՝ սեպտեմբերի 13-ի կեսգիշերին հայ - ադրբեջանական սահմանին սկիզբ առած ինտենսիվ ռազմական գործողությունների հետևանքով, ըստ պաշտոնական տվյալների, հայկական կողմից 206 զոհված և անհետ կորած կա, առնվազն 20 ռազմագերի, ադրբեջանական կողմից՝ 80 զոհված, երկու կողմերը հարյուրավոր վիրավորներ ունեն: Սեպտեմբերի 14-ի երեկոյան հայտարարվել է հրադադարի մասին: Այն, սակայն, պարբերաբար խախտվում է, ինչի հետևանքով հայկական կողմն արդեն 3 զոհ և մեկ վիրավոր ունի, ադրբեջանականը՝ 4 վիրավոր:
Սեպտեմբերի 28-ի ժամը 22-ից իրավիճակը սահմանին հարաբերականորեն կայուն է:
