Կարդացեք նաև
Զախարովան` Երևանից ՀԱՊԿ-ի հասցեին հնչող քննադատությունների մասին
ՀԱՊԿ-ի մասին քննադատությունները, որոնք հնչեցնում են առանձին քաղաքական գործիչներ, չեն նպաստում փոխընդունելի լուծումների որոնմանը։ Այսօր կայացած ճեպազրույցում այս հայտարարությունն է արել ՌԴ ԱԳՆ պաշտոնական ներկայացուցիչ Մարիա Զախարովան։

«Դրանից օգուտ քիչ կա։ Իմաստն այլ է։ Այսօր Երևանում Զասը Փաշինյանին կներկայացնի ՀԱՊԿ առաքելության դիտարկման արդյունքները։ Մինչ այդ զեկույցը ներկայացվել էր ՀԱՊԿ մշտական խորհրդի շրջանակում։ Փորձագիտական առաքելությունը տեղում ծանոթացել է իրավիճակին»,- ասել է Զախարովան։

Դիվանագետը նշել է, որ Հայաստանը ՀԱՊԿ զորավարժություններին զորակազմ չուղարկելու որոշումը, ըստ ամենայնի, կայացրել է ընթացիկ խնդիրներից ելնելով։ Նրա խոսքով` դա հանրապետության սուվերեն իրավունքն է։

Միաժամանակ ՌԴ ԱԳՆ պաշտոնական ներկայացուցիչը նշել է, որ Մոսկվան ՀԱՊԿ-ի շրջանակում Երևանի հետ համագործակցությունը գնահատում է արդյունավետ, իսկ կազմակերպությունում երկրի նախագահությունը համընկել է հատուկ սպառնալիքների ժամանակաշրջանի հետ։

«Գագաթնաժողովը կամփոփի 20 տարվա արդյունքները և կուրվագծի հետագա համագործակցության հեռանկարները»,- ասել է Զախարովան։

Հիշեցնենք, որ Հայաստանը ձեռնպահ է մնացել Ղազախստանում ՀԱՊԿ զորավարժություններին մասնակցելուց՝ պայմանավորված Ադրբեջանի հետ սահմանին տիրող իրավիճակով։ Երևանում է ՀԱՊԿ գլխավոր քարտուղար Ստանիսլավ Զասը, որն արդեն հանդիպել է ՀՀ վարչապետ Նիկոլ Փաշինյանի հետ՝ նրան ներկայացնելով ՀԱՊԿ առաքելության աշխատանքի նախնական արդյունքները։ Կողմերը մանրամասն քննարկել են ՀԱԿՊ աշխատանքը և տարածաշրջանում տիրող իրավիճակը։
29 Սեպտեմբեր‎ 2022 - 18:17
67
Աղբյուր auroranews.am

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև