Մինչ ներհայաստանյան օրակարգում հրապարակ է նետվել Ռուսաստան, թե՝ Արևմուտք արտաքին քաղաքական-դաշնակցային նախապատվությունների թեման, կարծեք կրկին անտեսվում է այդ ամենի տնտեսական բաղադրիչը՝ իբրև որևէ հանգրվանի հնարավոր հետևանք։  Հայաստանի՝ ՀԱՊԿ-ից դուրս գալու մասին խոսակցություններից պիտի ենթադրել, որ, մեծ հաշվով, խոսքը ռուսական կողմնորոշման փոփոխության մասին է, հետևապես, ի հայտ են գալիս դրա՝ այսպես կոչված մյուս մետաստազները՝ ԵԱՏՄ, ԱՊՀ և այլն։ 

Տնտեսական ի՞նչ ռիսկեր է պարունակում ՌԴ-ի հետ՝ որևէ ձևաչափով գործակցության սառեցումը, մանավանդ, որ մեր տնտեսությունը խորապես ու սերտորեն առնչվում է Ռուսաստանին։

«Երկիրը չի կարող լինել x ինտեգրման մեջ, բայց անդամակցի y անվտանգային ուժի հետ։ Հայաստանի արտաքին առևտրի թիվ մեկ գործընկերը Ռուսաստանն է։ Միայն այս տարվա 7 ամիսների հաշվարկով՝ ՀՀ-ից Ռուսաստան է արտահանվել 762 միլիոն դոլարի ապրանք, ինչը նախորդ տարվա այս ժամանակահատվածի համեմատ աճել է 70 տոկոսով»,- ԼՈՒՐԵՐ․com-ի հետ զրույցում նշեց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը։

Նրա խոսքով, այդ ցուցանիշի մեջ առկա է նաև ռեէքսպորտի (վերաներմուծման) գործոնը, քանի որ հակառուսական պատժամիջոցներով պայմանավորված՝ Հայաստանը դարձել է տնտեսական տարանցիկ երկիր և մի շարք ապրանքներ մեր երկրի միջոցով արտահանվել են Ռուսաստանի դաշնություն։ Ըստ տնտեսագետի, հանանման կարգավիճակում են նաև հարևան Վրաստանը, Թուրքիան և Ադրբեջանը։

«Պետք է արձանագրել նաև Ռուսաստանից Հայաստան տրանֆերտների դինամիկան․ այս տարվա 7 ամիսների ընթացքում ՌԴ-ից մեր երկիր փոխանցվել է շուրջ 1,5 միլիարդ ԱՄՆ դոլար, ինչը լուրջ գումար է թե՛ տնտեսության, թե՛ բնակչության համար։ Հավելյալ եկամուտ են ապահովել ռուս տուրիստների և ռուսական կապիտալի հոսքը՝ մեր հանրապետություն։ Կարող ենք պնդել, որ ռուս-ուկրաինական հակամարտության պայմաններում Հայաստանը տնտեսապես շահեկան դիրքում է հայտնվել»,-նշեց Պարսյանը։

Տնտեսագետն ընգդծեց նաև, որ Հայաստանը պարենային մթերքի 60-70 տոկոսը ձեռք է բերում Ռուսաստանից, ցորենի և էներգակիրների դեպքում՝ խոսքը, համապատասխանաբար, 90 տոկոսի մասին է։

«Այս բարդ ու ճգնաժամային իրավիճակում այլ երկիր և այլ մատակարար գտնելը չափազանց բարդ է։ Եթե Ռուսաստանն, օրինակ՝ որոշի սահմանափակել ցորենի, նավթի, գազի ներմուծումը Հայաստան՝ դա կբերի տնտեսական ու պարենային ճգնաժամի»,-եզրափակեց մեր զրուցակիցը։

Արա Ալոյան