Կարդացեք նաև
Ներքին Հանդում թշնամին ամրաշինական աշխատանքներ է կատարում. Ինչ իրավիճակ է տիրում այս պահին Սյունիքում և Կութում
Տեղեկություններ էին տարածվել, որ երեկ՝ սեպտեմբերի 25-ին Գորիսի օդային տարածքում թշնամու անօդաչուներ են նկատվել` վեցից-յոթ հատ:

Ankakh.com-ի հետ զրույցում  Գորիսի համայնքապետարանի աշխատակիցը, որը խնդրեց իր անունը գաղտնի պահել, ասաց, որ իրականում ոչ թե անօդաչուներ չեն նկատվել երկնքում, այլ էլեկտրաէներգիայի խափանման հետևանքով տագնապի ազդանշանն է երեք անգամ միացել մի քանի րոպե երկարությամբ:

՛՛Բարեբախտաբար կարողացել են աշխատակիցները արագ անջատել ու ազդանշանն այդքան էլ երկար չի աշխատում: Անօդաչուների մասին լուրը այդ ազդանշանի պատճառով են տարածվել, իրականում ոչ մի անօդաչու էլ երեկ ոչ էլ այսօր  գորիսի երկնքում չեն նկատվել՚՚,-ասաց համայքնապետարանի աշխատակիցը:

Կապ հաստատեցինք նաև Գորիս համայնքի Վերին ու Ներքին Խնձորեսկների վարչական ղեկավար Երվանդ Մալունցն ասաց, որ գյուղի տղամարդիկ շարունակում են մարտական հերթապահություն իրականացնել և որ դա իրենց համար կենսակերպ է դարձել: Թշնամու կողմից որևէ շարժ կամ փոփոխություն չի նկատվել:

Նույն իրավիճակն է նաև Գորիս համայնքի Շուռնուխ, Բարձրավան ու Որոտան գյուղերում: Մեզ տեղեկացրին, որ թշնամական զինծառայողների թվի կամ դիրքերի փոփոխություն չկա, շարժ չկա, սակայն, չնայած դրան՝ հայկական գյուղերի բնակիչները աչալուրջ են ու հետևում են վերջիններիս ամեն մի քայլին:

Սիսիանի Իշխանասար բնակավայրի վարչական ղեկավար Մարատ Պետրոսյանն ասաց, որ իրենց գյուղում իրավիճակը հանգիստ է, գյուղացիներն այսօր ակտիվ մասնակցել են ՏԻՄ ընտրություններին: ՏԻՄ ընտրություններով են զբաղված եղել նաև Սիսիանի Անգեղակոթ գյուղում: Անգեղակոթի վարչական ղեկավար Արմենակ Մարկոսյանն ասաց, որ թշնամու կողմից որևէ գործողություն, կրակոց կամ անհանգստության այլ նշան չի դրսևորվել:

Իրավիճակը փոքր ինչ այլ է Ներքին Հանդում, որտեղ չնայած վերջին պատերազմից հետո մեկ անգամ է թշնամու կողմից կրակոց արձանագրվել, սակայն վերջիններս ամրաշինական աշխատանքներ են տանում դիրքերում: Ankakh.com-ին այդ մասին տեղեկացրեց Ներքին Հանդ բնակավայրի բնակիչներից մեկը: Վերջինիս խնդրանքով անունը չենք հրապարակում, քանի որ Ներքին Հանդի բնակիչն ասաց, որ իրենց մյուս գյուղացին, որը լրագրողներին տեղեկատվություն էր տրամադրել թշնամու տեղադրության վերաբերյալ, ճնշումների էր ենթարկվել:

Ներքին Հանդի բնակիչն ասաց, որ թշնամին Ներքին Հանդի գրաված դիրքերում մեծացնում է իր զինվորականների թիվը և շատ ակտիվ աշխատանքներ են տանում ամրաշինական:

Սյունիքի Տեղ համայնքում ևս հանդարտ է, իսկ Խնածախ և Խոզնավար գյուղերում թշնամին սադրանքների չի դիմել, հանդարտ է: Այդ մասին մեզ տեղեկացրին երկու գյուղի բնակիչները, ովքեր նշեցին, որ թշնամու դիրքերն այնքան մոտ են իերնց, որ ամեն մի տեղաշարժը կարողանում են դիտարկել:

Կապ հաստատեցինք նաև Գեղարքունիքի մարզի Կութ գյուղի վարչական ղեկավար Գրիգոր Ավագյանն ասաց, որ բնակիչները դեռևս շարունակում են վերադառնալ գյուղ:

Ավագյանը Ankakh.com-ին ասաց, որ գյուղի բնակչության մեծ մասը չի վերադարձել, բայց բոլորն էլ կվերադառնան, իսկ գյուղը սկսել է ապրել իր առօրյա կյանքով: Թշնամու կողմից կրակոց կամ այլ սադրանք չի դիտարկվել այս օրերին:
25 Սեպտեմբեր‎ 2022 - 22:55
146
Աղբյուր ankakh.com

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև