Կարդացեք նաև
ՌԴ զինված ուժերում հայազգի ծառայողներ կան, մոբիլիզացիայի վերաբերյալ գրություն չենք ստացել․ Տյումենի հայ համայնքի ղեկավար
Ինչպես հայտնի է, երեկ Ռուսաստանի Դաշնության նախագահ Վլադիմիր Պուտինը հրամանագիր է ստորագրել ՌԴ-ում մասնակի մոբիլիզացիա սկսելու մասին։

Ըստ նրա՝ զորակոչի կենթարկվեն միայն այն քաղաքացիները, ովքեր պահեստազորում են։ Նրանք լրացուցիչ ուսուցում կանցնեն՝ հաշվի առնելով Ուկրաինայի հատուկ գործողության փորձը։ Զորահավաքային աշխատանքները մեկնարկել են հենց երեկվանից։ Պաշտպանության նախարար Սերգեյ Շոյգուն էլ ավելի ուշ հայտարարել էր, որ կզորակոչվի 300 հազար մարդ։

Վլադիմիր Պուտինի այս հայտարարությունից հետո սոցցանցերում սկսվեցին տարածվել տեղեկությունները, թե զորակոչի համար ՌԴ որոշ տարածքներից հիմնականում կանչվում են ազգությամբ հայ, բայց Ռուսաստանի քաղաքացիություն ունեցող անձինք։ «Հանուն հանրապետության» կուսակցության նախագահ Արման Բաբաջանյանն էլ «Ֆեյսբուքի» իր էջում հրապարակել էր ՌԴ-ում՝ մոբիլիզացիայի մասին հրամանագրից հետո Տուապսեից զինվորագրման ենթակա քաղաքացիների ցուցակը, որոնցից 90 տոկոսից ավելին ազգությամբ հայեր էին։ «Տուապսեի բնակչությունը 60 հազար է, որից ռուսները՝ 75, հայերը՝ 8 տոկոս են կազմում»,- գրել էր Բաբաջանյանը:

Տուապսեի հայ համայնքի ներկայացուցիչների հետ մեզ չհաջողվեց կապ հաստատել, փոխարենը «Հայկական ժամանակը» զրուցել է ՌԴ Տյումենի մարզի հայկական համայնքի ղեկավար Աբրահամ Հովեյանի հետ։ Համայնքի ղեկավարի խոսքով՝ մոբիլիզացիայի վերաբերյալ հայկական համայնքը որևէ գրություն չի ստացել, հայտարարությունից հետո համայնքում խուճապ նույնպես չկա։

«Որևէ անհանգստություն, խուճապ մեր հայրենակիցների շրջանում չկա։ Որևէ խնդիր չի առաջացել, իսկ եթե խնդիրներ լինում են, ապա այդ դեպքում մեր բնակիչները դիմում են մեզ, և ամեն ինչ կարգավորվում է»,- ասում է նա։

Տյումենի մարզում բնակվում է շուրջ 25 հազար հայ։ Կան և՛ Հայաստանի քաղաքացիներ, և՛ ազգությամբ հայ, բայց ՌԴ քաղաքացիություն ունեցող անձինք։ Հովեյանի խոսքով՝ ռուս-ուկրաինական հակամարտության սկսվելուց ի վեր հայ համայնքի շրջանում զոհեր նույնպես չկան:

«Տեղեկություն չունենք, թե մեր համայնքից քանի հայ է ծառայում ՌԴ զինված ուժերում, բայց եթե իրենք ՌԴ քաղաքացի են, ապա, օրենքի համաձայն, պետք է ծառայեն ՌԴ զինված ուժերում: Ինչպես Հայաստանում է՝ 18 տարին լրանալուց հետո տղաները զորակոչվում են ծառայության, նույն էլ այստեղ է գործում, եթե դու ՌԴ քաղաքացի ես, կապ չունի, թե ինչ ազգության ես, զորակոչվում ես բանակ։ Բնական է, որ կան հայազգի ներկայացուցիչներ, ովքեր, լինելով ՌԴ քաղաքացի, հիմա ծառայում են»,- նշում է հայկական համայնքի ղեկավարը։

Ըստ Հովեյանի՝ մամուլում տարբեր տեղեկություններ են տարածվում, թե ՌԴ այս կամ այն հայկական համայնքներում խուճապ կա, սակայն Տյումենի հայկական համայնքում այդ անհանգստությունը բացակայում է։ Զրուցակիցը նաև շեշտում է՝ մարզը ամենաբազմազգ համայնքն է ՌԴ-ում, ապրում է 160-ից ավելի ազգ։

«Համերաշխ մարզ է, որևէ ազգ այլ ազգի ներկայացուցչի հետ չի փորձում խնդիրների մեջ ընկնել։ Յուրաքանչյուր ազգ փորձում է պահել համերաշխության մթնոլորտը։ Երեկ էլ, այսօր էլ ոչ ոք ինչ-որ տագնապի մեջ չի ընկել, ամեն ինչ մեզ մոտ կարգին է, իրավիճակը՝ հանգիստ»,- ասում է նա։

Նշենք, որ Ռուսաստանում մասնակի մոբիլիզացիա հայտարարելուց հետո Մոսկվայում բողոքի ակցիաներ են սկսվել։ Հազարավոր մարդիկ իրենց բողոքը արտահայտելու համար դուրս են եկել փողոց և վանկարկում են՝ «բաց թող»։ Ոստիկանությունը, սակայն, վերջիններիս բերման է ենթարկում։
22 Սեպտեմբեր‎ 2022 - 21:14
183
Աղբյուր armtimes.com

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև