Ինքը ոչ մի բան ա, ինձ չի հետաքրքրում իր խոսքը․ Մովսես Հակոբյանը՝ Սասուն Միքայելյանին
ԵԿՄ նախագահ Սասուն Միքայելյանը երեկ «Հանրայինի» եթերում Պետրոս Ղազարյանի հետ հարցազրույցի ժամանակ հայտարարեց, որ նախկինների օրոք բանակի գեներալները թալանով են զբաղված եղել։
Նա, մասնավորապես, անդրադարձավ ԼՂՀ Պաշտպանության նախկին նախարար, ՀՀ ԳՇ նախկին պետ, գեներալ-գնդապետ Մովսես Հակոբյանին, նշելով․
«Մովսես Հակոբյան, դու դարձար բանակի կանաչ փող հավաքողը։ Դու որ խոսում ես, մի քիչ քո չափով խոսիր, սաղ օրը Ծաղկաձորներում քարշ ես գալիս, եկել Հյուսիսային պողոտայում ապրում ես ու հայրենասիրությունից ես խաղում։ Բա էսօր Արցախը ծանր վիճակում է, էդ էլիտան ինչի՞ չի գնում Արցախ, բա ղարաբաղյան կլանը թող գնա Արցախ, Հայաստա՞նն է ձեզ պետք, թե՝ Արցախը, ես մինչեւ հիմա չեմ հասկանում»։
Հակոբյանը հրաժարվեց արձագանքել Միքայելյանի խոսքին՝ ասելով, որ նա ոչ մի բան է, ի՞նչ մեկնաբանի։
«Ես ուրախանում եմ, որ ինձ ու իմ գործը նրա պեսներն են քննադատում, այլ ոչ՝ արժեքավոր մարդիկ»,- շեշտեց Հակոբյանը։
Նա նկատեց՝ Միքայելյանի վերաբերյալ իր գնահատականն ավելի վաղ տվել է։
Հիշեցնենք, որ հունվարի 28-ին Միքայելյանը հայտարարել էր, թե երեսուն տարի բանակ չենք ունեցել, որին անդրադարձել էր նաև Մովսես Հակոբյանը։
«Ես ծառայել եմ հայկական բանակում։ Ինչո՞ւ եք ինձ Սասուն Միքայելյանից հարցեր տալիս։ Նա ո՞վ է, իր տեսքին, իր խոսքին որ հետևում եք, ինքն իրավունք ունի՞ որևէ գնահատական տալու մեկին, իր գնահատականն ինձ համար զրո է։ Դե, փողոցի մաքրուհիներից էլ հարցրեք, իրենք էլ գնահատական կտան բանակի մասին, ինքն այդ դասին է դասվում։ Բանակի մասին գնահատական տալու համար ինքը դասվում է փողոցի հավաքարարի՝ մեծ հարգանքով փողոցի հավաքարարների հանդեպ, գուցե իրենք իրենց գործը լավ են անում… ինքն այդտեղից կարող է խոսել, ոչ բանակից»,- մասնավորապես ասել էր նախկին զինվորականը։
Նարե Գնունի
