Ձմռան ցրտին Արցախում կրկին գազ չկա։ Ադրբեջանը նախօրեից խափանել է գազամատակարարումը։ Հայաստանից Արցախ հասնող էլեկտրաէներգիայի միակ գիծը վնասված է հունվարի 9-ից։ Բնակիչներին հոսանքը հասանելի է օրական մի քանի ժամ:

Հումանիտար ճգնաժամը պետք է կոնսոլիդացնող նշանակություն ունենար Արցախի քաղաքական էլիտայի համար:

Սակայն եղած խնդիրներին ավելացել է ներքաղաքական ճգնաժամը, որը, մի կողմից, գրեթե անհամատեղելի է դարձնում նախագահ Արայիկ Հարությունյանի ու պետնախարար Ռուբեն Վարդանյանի պաշտոնավարումը, մյուս կողմից՝ փակուղին ավելի ընդգծվում է այն հանգամանքով, որ այսօր Արցախում գրեթե անհնար է ընտրությունների անցկացումը:

Սահմանադրական փոփոխությունները, որոնք շրջանառության մեջ են դրվել օրերս, հնարավոր են դարձնում նախագահի ընտրությունն ԱԺ-ի կողմից: Սա նաև հնարավոր է դարձնում, օրինակ, ԱԺ ընտրությունների անցկացումը՝ նախագահի ընտրություններից անջատ:

Սա, թերևս, Արայիկ Հարությունյանին թույլ կտա իշխանության նոր կոնֆիգուրացիա ձևավորել՝ պետնախարար փոխելով ու ԱԺ լուծարելով:

Ասում են սա է պետնախարարի հավակնություններ ունեցող Սամվել Բաբայանի օրակարգը, ով փորձում է, մի կողմից, թուլացնել Արցախի նախկին նախագահ Բակո Սահակյանի ու նրա թիմի ազդեցությունը, մյուս կողմից՝ «խաղից դուրս» դնել հնարավոր մրցակիցներին:

Այս համատեքստում պետք է դիտարկել քրեական գործի հարուցումը, որն առչնվում է Անվտանգության խորհրդի նախկին քարտուղար Վիտալի Բալասանյանին:

Վահրամ Բագրատյան