Հայաստանի արտգործնախարարը երեկ մեկնել է Թուրքիա: Անկարայում կայացել է Արարատ Միրզոյանի հանդիպումը Թուրքիայի արտաքին քաղաքական գերատեսչության ղեկավար Մևլութ Չավուշօղլուի հետ:

Հանդիպումից հետո Միրզոյանն ու Չավուշօղլուն հանդես են եկել մամուլի համար հայտարարություններով:

Միրզոյանի հայտարարությունները խիստ լավատեսական են: Նա մասնավորապես ասել է, թե «ունենք համաձայնություն համատեղ ջանքերով վերանորոգել Անիի կամուրջը, ինչպես նաև հոգ տանել համապատասխան ենթակառուցվածքների մասին սահմանի ամբողջական բացմանն ընդառաջ»:

Թուրքիայի ԱԳ նախարարը նույնպես խոսել է կոնկրետ պայմանավորվածությունների մասին:

«Խոսեցինք այն քայլերի մասին, որ կարող ենք ձեռնարկել: Առաջինը պատմական Մետաքսի ճանապարհի վերականգնումն է։ Եվ ապագային նայելով մենք, օրինակ, երկկողմանի ուսումնասիրում ենք սահմանային անցակետերը, կամուրջները: Ինչ վերաբերում է ճանապարհներին՝ կան քայլեր, որոնք կարող ենք ձեռնարկել։ Եվ մենք համաձայնել ենք արագացնել այդ քայլերը», - ասել է Չավուշօղլուն, ապա կոնկրետացրել է. 

«Կան երկու կամուրջներ, որոնցից մեկը Հայաստանում է, մյուսը՝ Թուրքիայում: Մետաքսի ճանապարհի այս պատմական կամրջի վերականգնումը շատ էական է, և մենք պատրաստվում ենք միասին աշխատել այս ուղղությամբ։ Մենք հատուկ բանագնացները կզբաղվեն այս հարցով»:

Թվում է՝ գոյություն ունի հայ-թուրքական սահմանը բացելու քաղաքական պայմանավորվածություն, որոշում, սակայն Չավուշօղլուի մի դիտարկում ավելի զգուշավոր լինելու հիմքեր է ստեղծում:

Նա բարձր է գնահատել Հայաստանի մարդասիրական գործելակերպը, և կարծիք է հայտնել, որ այն կաջակցի նաև Ադրբեջանի, Թուրքիայի ու Հայաստանի հարաբերությունների կարգավորման գործընթացին:

Այլ խոսքով, Թուրքիայի ԱԳ նախարարը հայ- թուրքական հարաբերությունների կարգավորման գործընթացը, իհարկե՝ դիվանագիտական նուրբ տողակատով, դարձյալ կապել է հայ- ադրբեջանական հարաբերությունների կամ առնվազն դրանցում ակնկալվող առաջընթացի հետ:

Ըստ այդմ, մեկ այցի արդյունքում հնչած հայտարարությունները բավարար չեն՝ խոսելու համար Անկարայի դիրքորոշումների կտրուկ փոփոխության մասին:

Վահրամ Բագրատյան