«Մալաթիա» տոնավաճառն այսօրվանից մասամբ սկսել է գործել: Որոշ տնտեսվարողներ արդեն բացել են տաղավարները, դրան զուգահեռ ընթանում են հրդեհային անվտանգության հետ կապված աշխատանքներ:
Տաղավարների մեծ մասը, սակայն, դեռևս փակ է մնում: Տոնավաճառում քիչ մարդիկ կան, պատերին գրեթե ամեն մետրի վրա փակցվում են հակահրդեհային տեղեկատվական իրազեկումներ, տեղադրվում են կրակմարիչներ ու հրդեհի առաջացման դեպքում առաջին անհրաժեշտության այլ պարագաներ:
Հիշեցնենք, որ փետրվարի 1-ին, կասեցվել էր առևտրի կենտրոնի գործունեությունը։ Տոնավաճառում չեն պահվում հրդեհային անվտանգության կանոնները։ Տեսչական մարմինը մինչ այդ ժամանակ էր տվել՝ թերությունները շտկելու համար, սակայն տնտեսվարողն արձանագրած խախտումները չէր վերացրել։
Նույն օրը տեսչական մարմնի ղեկավար Գարեգին Խաչատրյանը, ՏՄ հրդեհային և տեխնիկական անվտանգության վարչության մասնագետները հանդիպել են «ՌԱՖԱՅԵԼ-ՏԱԹԵՎ» ՍՊ ընկերության (Մալաթիա տոնավաճառի) տնօրինության և այնտեղ գործունություն իրականացնող տնտեսավարող սուբյեկտների հետ։
Հանդիպման ընթացքում քննարկվել են տեսչական մարմնի արձանագրած խնդիրները և դրանց լուծմանն ուղղված աշխատանքների իրականացման հարցը։
«Մալաթիա» տոնավաճառի տնօրենը երեկ ՀՀ քաղաքաշինության, հրդեհային և տեխնիկական անվտանգության տեսչական մարմնին էր ներկայացրել դիմում, որով տեղեկացրել էր, որ արձանագրված և մատնանշված բոլոր թերությունները տոնավաճառում վերացված են։
