Կարդացեք նաև
Խուճապի մատնվել պետք չէ, բայց պետք է սթափ և օբյեկտիվ գնահատել իրավիճակը. առաջնագծում տղաները ամուր են և պատրաստակամ
Թեև Հայաստանի սահմաններին Ադրբեջանի սանձազերծած ագրեսիայից անցել է մի քանի օր, և հայտարարված հրադադարը շարունակվում է պահպանվել, բայց, ըստ ՀՀ իշխանությունների, այն փխրուն է, և պետք չէ զգոնությունը թուլացնել։ Այս ամենի հետ մեկտեղ շեշտվում է, որ Հայաստանը պատրաստ է պաշտպանել իր տարածքային ամբողջականությունը:

Սրան զուգահեռ, սակայն, հայկական տեղեկատվական դաշտում որոշ ուժեր և անհատներ պարբերաբար տարածում են անհանգստություն, խուճապ առաջացնող տեղեկություններ՝ կապված առաջիկայում սպասվող մեծ պատերազմի հետ։ Դաշտ են նետվում նաև դիվերսիոն խմբերի՝ ՀՀ տարածք ներթափանցման, սահմաններում զորքերի կուտակման և այլնի մասին խոսակցություններ:

«Քաղաքացիական պայմանագիր» խմբակցության պատգամավոր Դավիթ Դանիելյանը «Հայկական ժամանակի» հետ զրույցում նկատում է՝ մեր հասարակությունը բաժանվել է երկու մասին․ կան մարդիկ, որոնք հավատում են մեդիայում տարածվող ցանկացած տեղեկատվության, ուստի շուտ են մատնվում խուճապի, կան մարդիկ էլ, որոնք հետևում են միայն պաշտոնական տեղեկատվությանը և ավելորդ անհանգստությունից զերծ մնում։

«Վախ, խուճապ, անհանգստություն և մոլորեցնող տեղեկությունների հետևում կարող են լինել դրսում կամ ներսում գտնվող այն մարդիկ, որոնց նպատակը մեր պետությունը թուլացնելն է։ Գուցե Հայաստանի ներսում հակառակորդի շահերը պաշտպանող ուժերն են փորձում ինչ-որ կեղծ լուրեր տարածելով՝ թուլացնել մեր թիկունքը։ Սակայն եթե սահմանին կանգնած տղաները չեն վախենում, թիկունքում գտնվողներն ինչո՞ւ են վախենում։ Մենք ոչնչից չպետք է վախենանք»,- շեշտում է Դանիելյանը։

Ըստ պատգամավորի՝ այս օրերին խուճապի մատնվել պետք չէ, բայց պետք է սթափ և օբյեկտիվ գնահատել ստեղծված իրավիճակը։ Նրա հավաստմամբ՝ առաջնագծում տղաները կանգնած են ամուր ու պատրաստակամ՝ կանխելու հակառակորդի ցանկացած ոտնձգություն հայրենիքի նկատմամբ։

«Անհանգստություն առաջացնելով՝ փորձում են մարդկանց մեջ խուճապ մտցնել, թուլացնել իշխանությանը, որովհետև եթե թուլացնես իշխանությունը, կթուլացնես պետությունը։ Հիմա շատ մարդիկ կան, որ թքած ունեն պետական շահի վրա, նրանք ամեն գնով ուզում են գալ իշխանության, փոխանակ լուրջ գործով զբաղվեն և տարբեր գործողությունների միջոցով որևէ օգուտ տան երկրին»,- կարծում է նա։

Դանիելյանի խոսքով՝ ինքն այժմ Սյունիքի մարզում է՝ սահմանում կանգնած տղաների կողքին։ Նշում է՝ մարզի ամենավտանգավոր կետերից կանանց և երեխաներին տարհանել են ավելի ապահով վայրեր, բայց տղամարդիկ զենքն ուսերին՝ առաջնագծում են՝ հայրենիքը պաշտպանելու պատրաստակամությամբ․ «Մենք այն վիճակում ենք, որ մեկ սանտիմետր հետքայլ չենք կարող անել, մեր երկիրը շատ փոքր է՝ հողեր զիջելու համար, մեր միակ տրամաբանական պահանջն այն է, որ հակառակորդը հետ քաշվի մեր դիրքերից։ Առանց դրա որևէ բան քննարկելը կամ բանակցելն անիմաստ է»:

Ստեղծված իրավիճակում գլխավորը հայրենիքն է ու դրա պաշտպանությունը, ասում է  պատգամավորը, այս պահին կուսակցությունը, մանդատն ու պաշտոնը որևէ նշանակություն չունեն։ Պետք է համախմբվել հայրենիքի շուրջ ու լինել միասնական, քանի որ մեր հաղթանակները գրանցվել են միայն համախմբվածության շնորհիվ։ «Առաջնագծում որևիցե խուճապ ու թափթփվածություն չկա, բոլորը իրենց տեղերում կանգնած են։ Սա ճակատագրական պահ է, և գլխավորը միայն մեր հայրենիքն է»,- ընդգծում է Դավիթ Դանիելյանը։

ԱԻՆ Փ\Ծ հոգեբանական աջակցության բաժնի կրտսեր հրահանգիչ փ|ծ ավագ ենթասպա Հասմիկ Ղուշչյանն էլ մեզ հետ զրույցում ասում է՝ իրականությանը չհամապատասխանող, տարածվող կեղծ լուրերն ավելի մեծ բացասական ազդեցություն են թողնում մարդկանց վրա, հատկապես, երբ մեր հասարակությունը նոր էր հաղթահարել «Սուրմալու» առևտրի կենտրոնում տեղի ունեցած դժբախտ դեպքը։ Ըստ նրա՝ այս ամենը կրկնակի նպաստեց, որ մեր հասարակության շրջանում ստեղծվի հոգեբանական լարվածության բարձր ֆոն։

ԱԻՆ հոգեբանական աջակցության թեժ գիծը քաղաքացիների համար հասանելի է միշտ։ Թե՛ 44-օրյա պատերազմի ժամանակ, թե՛ սեպտեմբերի 13-ին սկսված սահմանային լարման ընթացքում և դրանից հետո էլ ԱԻՆ-ի մասնագետները շարունակում են անհրաժեշտ աջակցություն ցուցաբերել այն մարդկանց, ովքեր դրա կարիքն ունեն։

«Բավականին ակտիվ է դիմելիությունը, քաղաքացիների զանգերը շատ են։ Այս ընթացքում որքան զանգ է եղել, չեմ կարող նշել, քանի որ թիվը պարբերաբար փոփոխվում է։ Հիմնականում շատ են այն մարզերից, որի սահմաններում ռազմական գործողություններ են ընթացել: Այնտեղ ապրող ընտանիքները լսել են պայթյունի ձայներ և այլն։ Ըստ զանգի՝ հասկանում ենք՝ անհրաժեշտություն կա՞ այցելելու և տանը հոգեբանական աջակցություն ցուցաբերելու, թե՞ կարող ենք հեռախոսի միջոցով էլ»,- ասում է Ղուշչյանը։

Քաղաքացիները, որոնք դիմում են հոգեբանական աջակցության, հիմնականում վախ ունեն հենց պատերազմից։ Շատերի մոտ վախի մթնոլորտն է գերակշռում, որոշների մոտ էլ սթրեսային հատկություններ են նկատվում, ասում է մասնագետը։

«44-օրյա պատերազմի առաջին իսկ օրվանից էլ գործել է մեր թեժ գիծը, և քանի որ մասշտաբը ավելի մեծ էր, աշխատանքներ էինք տանում նաև ապաստարաններում։ Այս ընթացքում ապաստարաններում չի եղել աշխատանք, այլ կոնկրետ բնակավայրերում»,- նշում է ԱԻՆ հոգեբանը։
20 Սեպտեմբեր‎ 2022 - 16:30
37
Աղբյուր armtimes.com

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև