Բրազիլական ֆուտբոլի լեգենդ Պելեին հունվարի 3-ին հուղարկավորել են այն գերեզմանատանը, որն ինքն անձամբ էր ընտրել 19 տարի առաջ:

Հունվարի 2-ից ի վեր ավելի քան 230 հազար մարդ վերջին հրաժեշտը տվեց Պելեին «Սանտոսի» մարզադաշտում, իսկ հունվարի 3-ին նրա աճյունը հուղարկավորվեց Սանտուս քաղաքում գտնվող 14-հարկանի գերեզմանատան 9-րդ հարկում:

Memorial Necrópole Ecumênica-ը գրանցված է Գինեսի ռեկորդների գրքում՝ որպես աշխարհի ամենաբարձր գերեզմանատուն․ այնտեղ կա 16 հազար գերեզման։

Իր որոշումը Պելեն ժամանակին բացատրել է նրանով, որ Memorial Necrópole Ecumênica-ը գերեզմանատուն չի հիշեցնում։ Այն փոխանցում է հոգևոր աշխարհի հանգստությունն ու զգացողությունը։ Այն կառուցվել է Պելեի ընկերոջ՝ արգենտինացի Խոսե Ալտստուտի կողմից։

Բրազիլացի լեգենդար ֆուտբոլիստը մահացել է դեկտեմբերի 29-ին 82 տարեկանում։ Բրազիլիայում նրա մահվան կապակցությամբ հայտարարվել էր եռօրյա սուգ։