Կարդացեք նաև
Կեչուտի ոռոգման ջրատարն ու խմելու ջրի երկու ջրագծերից մեկը թշնամու ձեռքում են
Կեչուտի վարչական ղեկավարի խոսքով` այս պահին գյուղի բնակչության մոտ 30 տոկոսը վերադարձել է, սակայն դպրոցն ու մանկապարտեզը դեռ չեն գործում:
ԵՐԵՎԱՆ, 20 սեպտեմբերի – Sputnik. Վայոց Ձորի մարզի Ջերմուկ համայնքի Կեչուտ բնակվայրի ոռոգման ջրատարն ու խմելու ջրի երկու ջրագծերից մեկը հայտնվել է թշնամու ձեռքում։ Տեղեկությունը լրագրողների հետ զրույցում ասել է Կեչուտի վարչական ղեկավար Արտակ Բագրատյանը:
Համայնքում մեկ շաբաթ է` ոռոգման ջուրր չկա, խմելու ջուր կա ոչ բոլոր թաղամասերում։

«Այդ տարածքները գրավել են, ի՞նչ ջուր, ջուր չկա, ոռոգման ջուր չունենք։ Խմելու ջուրն էլ մասնակի կա. առանձին գիծ ունենք, որը վնասվել է, հիմա երկրորդ գծից ենք օգտվում։ Գյուղում կարտոֆիլի, այլ բանջարեղենի հողատարածքներ ունենք, միայն կարտոֆիլինը մոտ 10 հա է, եթե առաջիկա օրերին ջուր չլինի, դրանցից էլ կզրկվենք»,–ասել է համայնքի ղեկավարը։
Նրա խոսքով` վնասված է գազատարը, էլեկտրական հաղորդալարերը, որոնց վերականգնման համար աշխատանքներ են ընթանում։

Գյուղում Ադրբեջանի հարձակման հետևանքով խաղաղ բնակչության շրջանում տուժածներ չկան, վնասվել է 7 բնակելի տուն, այրվել է 100 հա դաշտ:
Չափազանց մտահոգ եմ. ԳԴՀ փոխդեսպանը ցնցված է Ջերմուկի ավերածությունների պատկերից
Բագրատյանը նշել է, որ այս պահին գյուղի բնակչության մոտ 30 տոկոսը վերադարձել է, այդ թվում կանայք, երեխաներ կան, սակայն դպրոցն ու մանկապարտեզը դեռ չեն գործում: Նրա խոսքով` հարձակումից հետո բնակիչները հեռացել են ու պատսպարվել իրենց հարազատների մոտ։
«Բացի այդ` պայթյուններից գյուղում շատ անասուններ են սատկել և վիրավորվել: Խոտը մնացել է սարում, մարդիկ չեն կարողանում բերել: Գոմեր են վնասվել»,-ասել է նա:

Հավելենք, որ Կեչուտում մեկ արկ ընկել է գերեզմանատան վրա, երեք արկ էլ՝ ջրամբարի մեջ:
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում  հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:

Սեպտեմբերի 14-ի ժամը 20։00-ից հայ-ադրբեջանական սահմանի երկայնքով  հրադադարի ռեժիմ է սահմանվել, որը պահպանվում է մինչ այս պահը։
Նիկոլ Փաշինյանը սեպտեմբերի 16-ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
20 Սեպտեմբեր‎ 2022 - 14:42
43
Աղբյուր armeniasputnik.am

Բաժանորդագրվեք մեր Ֆեյսբուկյան էջում, եղեք տեղեկացված և տեղեկացրեք։

Կարդացեք նաև