Դեկտեմբերի 12-ից Արցախն ամբողջապես շրջափակման մեջ պահող Ադրբեջանի իշխանությունները հանդես են եկել հերթական ցինիկ ու հակահայկական նախաձեռնությամբ՝ հայտարարելով 2020 թ․ 44-օրյա պատերազմից հետո իրենց վերահսկողության տակ անցած ԼՂ տարածքների գլխավոր հատակագծի մշակման մասին։
Քաղաքաշինության և ճարտարապետության պետական կոմիտեի նախագահ Անար Գուլիևը նշել է, որ գլխավոր հատակագիծն ընդգրկում է «Ղարաբաղի և Արևելյան Զանգեզուրի տարածքների ընդհանուր տարածքը»։
«Մշակվել է նաև Ստեփանակերտ քաղաքի, Հադրութի, Վարանդայի և այլ վայրերի գլխավոր հատակագիծը․ դրանում հաշվի են առնվել բնակավայրում կարգուկանոնը վերականգնելու և բնակչության վերադարձն ապահովելու կարևոր գործոններ»։
Ադրբեջանցի պաշտոնյայի խոսքով, 2020 թվականից սկսվել է շրջկենտրոնների՝ Շուշիի, Ակնայի, Սանասարի, Քարվաճառի և այլ տարածքների գլխավոր հատակագծերի պատրաստումը։ Նրա պնդմամբ, գլխավոր հատակագծեր մշակելիս ուշադրություն է դարձվել մշակութային օբյեկտների վերականգնմանը, հաշվի են առնվել առկա հուշարձանները։