ԱՄՆ-ում Դարել Բրուքսին դատապարտել են ավելի քան 700 տարվա ազատազրկման այն բանից հետո, երբ նա մխրճվել է ամբոխի մեջ Սուրբ ծննդյան տոնակատարության ժամանակ, News.am-ի փոխանցմամբ՝ հայտնում է Vice-ը։

Միջադեպը տեղի է ունեցել մեկ տարի առաջ՝ 2021 թվականի նոյեմբերին, Վիսկոնսին նահանգում։ Բրուքսը Սուրբ ծննդյան շքերթի ժամանակ մխրճվել է մարդկանց խմբի մեջ, ինչի հետևանքով վեց մարդ մահացել է, տասնյակ մարդիկ՝ վիրավորվել:

Դատարանի որոշմամբ տղամարդը ստացել է վեց ցմահ ազատազրկում և լրացուցիչ 700 տարվա ազատազրկում։ Դատավճիռը կայացրել են Բրուքսի գործողություններից տուժածների թվին համապատասխան։

Դատավոր Ջենիֆեր Դորոուն նիստում ասել է, որ Բրուքսը շատ արագ է վարել իր ամենագնացը, և նշել է, որ մեղադրյալը չի զղջում իր կատարած հանցագործության համար:

Միևնույն ժամանակ, ինքը՝ Բրուքսը, որն իրեն համեմատել է Հիսուսի հետ, հայտնել է, որ տեղի ունեցածը պլանավորված արարք չի եղել։

2022 թվականի հունիսին Նյու Յորքում մեքենան մեծ արագությամբ մխրճվել էր ամբոխի մեջ հետիոտնային անցման վրա։ Միջադեպի հետևանքով մեկ մարդ մահացել էր, չորսը՝ հոսպիտալացվել։